Астанада ұстаздардың кәсіби құзыреттілігін арттыруға арналған халықаралық оқыту жобасы іске қосылды. Бастама Қазақстан Республикасы мен Түркия Республикасы арасындағы білім беру саласындағы ынтымақтастық аясында жүзеге асырылып жатыр, деп хабарлайды елорда әкімдігінің ресми сайты.

Жобаны Астана қаласы әкімдігінің «Әдістемелік орталығы» Түркияның «TİKA» халықаралық түрік ынтымақтастық және үйлестіру агенттігімен бірлесіп ұйымдастырып отыр. Оқыту бағдарламасы елорда мектептері педагогтерінің кәсіби әлеуетін арттыруға және халықаралық тәжірибені білім беру үдерісіне енгізуге бағытталған.

Жобаның негізгі мақсаты – шетелдік озық тәжірибені Астана мектептерінің тәжірибесіне бейімдеу арқылы «Келешек мектеп» бағдарламасы аясында елорданың білім беру жүйесінің инновациялық әлеуетін дамыту.

Оқыту курстары педагогтер үшін толықтай тегін және бюджеттен тыс қаражат есебінен ұйымдастырылған. Бағдарлама аясында мұғалімдер «STEM интеграцияланған оқыту» және «Ойын технологиялары арқылы оқыту» бағыттары бойынша білімдерін жетілдіреді. Бұл тәсілдер оқушылардың зерттеушілік, шығармашылық және сыни ойлау дағдыларын дамытуға, сондай-ақ оқу үдерісінің тиімділігін арттыруға мүмкіндік береді.

Халықаралық курсқа Астана қаласының жалпы орта білім беру ұйымдарынан 111 педагог қатысуда. Сабақтар №103 жалпы орта білім беретін мектептің базасында «Келешек мектеп» мемлекеттік бағдарламасы аясында өткізіліп жатыр.

Мұндай халықаралық ынтымақтастық педагогтердің кәсіби дамуына жаңа мүмкіндік беріп қана қоймай, заманауи оқыту әдістемелерін білім беру тәжірибесіне енгізуге, тәжірибе алмасуға және елорда мектептеріндегі білім сапасын арттыруға ықпал етеді.

Источник: ГУ «Аппарат акима города Астана»