Отырар ауданы Темір ауылдық округінде жергілікті тұрғындарға «Экстремизм мен терроризмге қарсы күрес – ұлттық қауіпсіздіктің негізі» тақырыбында патриоттық бағыттағы ақпараттық-түсіндіру жұмыстары өткізілді.Іс-шараға облыстық ақпараттық түсіндіру тобының және аудандық Терроризмге қарсы комиссиясының мүшелері, аудандық ішкі саясат бөлімінің мамандары қатысты. Іс-шараның негізгі мақсаты – тұрғындар арасында терроризм мен діни экстремизмнің қауіпті салдарлары туралы түсінік қалыптастыру, олардың алдын алу жолдарын кеңінен насихаттау, сондай-ақ қоғамдағы бейбітшілік пен тұрақтылықты сақтауда ұлттық құндылықтардың маңызын дәріптеу болды.Жиын барысында мамандар экстремизм мен терроризмнің мәні, олардың қоғам тыныштығына, ұлттық бірлікке және жастар тәрбиесіне тигізетін кері ықпалдары туралы баяндады. Тұрғындарға күдікті жағдай туындаған кезде қандай әрекеттер жасау керектігі, қауіпсіздік ережелерін сақтау жолдары және құқық қорғау органдарына жедел хабар беру тетіктері түсіндірілді.Сонымен қатар, іс-шарада интернет желісінде таралып жатқан жат идеологияларға қарсы тұрудың жолдары, жеке көзқарасты қалыптастырудың маңыздылығы атап өтілді.Терроризмге қарсы комиссиясының мүшелері, қоғамдағы экстремистік және террористік топтардың белгілері мен қауіптілігі, олардың заңсыз әрекеттеріне араласудың құқықтық жауапкершілігі және қауіпсіздік шаралары туралы пікір білдірді.Кездесу соңында ұйымдастырушылар терроризм мен экстремизмге қарсы күрес – барша қоғамның ортақ міндеті екенін атап өтіп, әрбір азаматты қырағылық танытуға, бейбіт өмірді қорғауға шақырды.

Материал Түркістан облысы бойынша ТҚК аппаратының ақпараты негізінде дайындалды

Источник: Антитеррористический центр Республики Казахстан