Астана қаласы Байқоңыр ауданы әкімдігінің ұйымдастыруымен 8 наурыз – Халықаралық әйелдер күніне орай «Әлем әйелдермен әсем» атты мерекелік іс-шара өтті, деп хабарлайды елорда әкімдігінің ресми сайты.

Елорданың дамуы мен гүлденуіне өз үлестерін қосып, әр салада табанды еңбек етіп келе жатқан әйелдер қауымын құттықтауға арналған мерекелік іс-шараға қоғам қайреткерлері, елорданың дамуына атсалысып жүрген әр сала қызметкерлері (әйелдер), ауданның көпбалалы аналары және белсенділері қатысты.

Іс-шара аясында Байқоңыр ауданының алтын құрсақты, көпбалалы аналарына «Алтын» және «Күміс» алқалары салтанатты түрде табысталды. Бұдан бөлек, әр салада табанды еңбек етіп келе жатқан нәзік жандылар аудан әкімінің Алғыс хатымен марапатталды.

«Ауданымызда 350-ден аса «Алтын алқа» және 600-ге жуық «Күміс алқа» иегерлері тұрады. Бұл дегеніміз әйелдер қауымының қоғамда алатын орнының қаншалықты маңызды екенін білдіреді. Қазіргі қоғамда әйелдер тек отбасының береке-бірлігін ойлап қана қоймай, мемлекетіміздің өркендеуіне, саяси-әлеуметтік, мәдени мәселелердің шешілуіне белсене араласып келеді. Бала тәрбиесімен қатар, қаламыздың дамуына өлшеусіз үлес қосып жүрген сіздердің еңбектеріңізге қашан да бас иеміз!» - деді аудан әкімі Талғат Рахманберді.

Айта кетсек, Астанада 8 наурыз – Халықаралық әйелдер күні қарсаңында түрлі концерттер, қойылымдар, құттықтау іс-шаралары өткізілуде. Сонымен қатар, елорданың бес ауданында 70-тен астам көпбалалы ана «Алтын алқа» және «Күміс алқа» төсбелгілерімен марапатталды.

Источник: ГУ «Аппарат акима города Астана»