Эквадордың Гуаякиль қаласында өтіп жатқан кадеттер арасындағы дзюдодан әлем чемпионатында Қазақстан құрамасы командалық сайыста чемпион атанып, ел қоржынына тарихи алтын медаль салды. Бұл жеңіске Шымкент қаласының қос спортшысы – Тоғжан Төлебай мен Адия Жанахмет те өз үлестерін қосты.

 Тоғжан Төлебай (63+ кг) аралас командалық бәсекеде Қазақстан құрамасымен бірге әлем чемпионы атанды.

 Бұл – шымкенттік спортшының әлем чемпионатындағы тарихи алтыны.

 Тоғжан шешуші белдесулердің бірінде жапониялық қарсыласын сенсациялық түрде жеңіп, командасына маңызды ұпай әкелді. Жартылай финалдағы өзбекстандық қарсыласымен болған бәсекеде де шеберлігін көрсетіп, Қазақстанның финалға шығуына зор үлесін қосты.

 Ал финалда қазақстандықтар Бразилия құрамасын 4:3 есебімен жеңіп, әлем чемпионы атанды.

 Сонымен қатар, Адия Жанахмет (40 кг) чемпионаттың алғашқы күнінде күміс жүлдеге ие болып, өзінің әлем чемпионатындағы алғашқы медалін еншіледі. Жас спортшы қайсарлық пен жоғары шеберліктің үлгісін көрсетіп, әлемдік доданың жүлдегері атанып отыр.

 Осылайша Шымкенттің қос аруы әлемдік аренада ел намысын абыроймен қорғап, қала спортының мерейін үстем етті. Бірі тарихи алтынды қанжығасына байлады, енді бірі әлем чемпионатындағы алғашқы жүлдесін жеңіп алды.

Источник: ​ГУ "Аппарат акима города Шымкент"