Түркістан облысының әкімі Нұралхан Көшеровтің төрағалығымен газ саласындағы өзекті мәселелерге арналған мәжіліс өтті. Жиынға тұрғын үй-коммуналдық шаруашылығы және газ саласына жауапты басқарма басшылары, аудан, қала әкімдері мен газ тарату ұйымдарының өкілдері қатысты. Мәжілісте өңірдегі елді мекендерді табиғи газбен қамту жұмыстарының барысы, газ инфрақұрылымын дамыту, тұрғындарды көгілдір отынға қосу қарқыны және саладағы түйткілді мәселелер жан-жақты қаралды. Сонымен қатар кейбір газ тарату компанияларының жинақталған берешектері мен қаржылық міндеттемелерінің орындалу жағдайы талқыланды. Облыс әкімі жауапты мекемелерге газдандыру жобаларының мерзімінде әрі сапалы жүзеге асырылуын қамтамасыз етуді, сондай-ақ газ саласындағы қаржылық тәртіпті күшейтіп, жинақталған қарыздарды азайту бойынша нақты шаралар қабылдауды тапсырды. Айта кетейік, Облыс аумағында газ саласын дамыту жұмыстары қарқынды жүргізілуде. Өткен жылы 87 нысанның құрылысына 20,7 млрд теңге бөлініп, 45 нысан пайдалануға берілді. 41 елді мекендегі 102 мың халық табиғи газбен қамтылды. Атқарылған жүйелі жұмыстардың нәтижесінде өңірдегі 801 елді мекеннің 606 елді мекені (халық саны –1 887 455) табиғи газбен қамтылып, газдандыру деңгейі 88 пайызға жеткізілді. Биыл 74 нысанның құрылысына 13,7 млрд теңге бөлінді. Жыл соңына дейін 33 нысан пайдалануға беріліп, 34 елді мекендегі 35 мыңнан астам тұрғын газбен қамтылады. Қалған 41 нысан келесі жылға өтпелі. Нәтижесінде газдандыру деңгейі 90 пайызға жеткізіліп, 640 елді мекендегі 2 миллионға жуық тұрғын (89,5 %) табиғи газға қол жеткізеді. Түркістан облысы әкімінің баспасөз қызметі

Источник: ГУ "Аппарат акима Туркестанской области"