Қызылқоға ауданының Пробация есебінде тұрған азаматтармен «Діни сауатсыздық – діни экстремизмнің бастауы» тақырыбында маңызды кездесу өтті. Аталған іс-шара Атырау облысы Дін істері басқармасының қолдауымен, «Жәрдем-Атырау» корпоративтік қорының ұйымдастыруымен өтті. Шараға 20-ға жуық азамат қатысты.

Іс-шараға Атырау облысы Дін істері басқармасының басшысы Қаһарман Мусаев, «Жәрдем-Атырау» корпоративтік қорының директоры Артур Айтмағамбетов, директор орынбасары Мейірбек Құбышев, «Шапағат» қоғамдық қорының теолог мамандары Думан Күмісбек пен Алмат Закария, «Ақпараттық-талдау орталығы» КММ-ның маманы Исатай Ғизатов, Х. Досмұхамедов атындағы Атырау университетінің Психология және педагогика кафедрасының аға оқытушысы, педагогика ғылымдарының магистрі Қарабаева Нұргүл және «Азаматтық бастамаларды қолдау орталығы» қоғамдық қорының басшысы Ербол Жаулин арнайы қатысты.

Спикерлер өз сөздерінде діни сауаттылықтың қоғамдағы орны мен маңызын атап өтіп, діни экстремизм мен радикализмге қарсы тұрудың тиімді жолдарын ұсынды. Дін мен ұлттық дәстүр арасындағы сабақтастық, шынайы діни ақпарат көздерін тану, жат ағымдардың белгілерін ажырату және олардан қорғану тәсілдері жан-жақты түсіндірілді.

Теолог мамандар қатысушылардың көкейінде жүрген сұрақтарына нақты әрі өмірлік мысалдармен жауап беріп, жастардың радикалды ағымдарға ілесу себептері мен оны болдырмау тетіктері бойынша кеңес берді.

Кездесу соңында ақпараттық материалдар таратылып, ашық пікір алмасу алаңына ұласты.

Атырау облысының Терроризмге қарсы комиссиясы

Источник: Антитеррористический центр Республики Казахстан