Панфилов ауданында қуаттылығы 7 мың тонналық көкөніс пен жеміс-жидек сақтау қоймасы іске қосылды. Облыс әкімі Бейбіт Исабаев Панфилов ауданына жасаған екі күндік жұмыс сапары барысында ауданның осы және басқа да бірқатар әлеуметтік маңызы бар нысандарында болды, - деп хабарлайды Жетісу облысы әкімінің баспасөз қызметі.

Осыдан бір жыл бұрын «Валиев Аюпжан» шаруа қожалығының құны 220 млн. теңге болатын 1 мың тонналық заманауи жеміс сақтау қоймасы іске қосылған болатын. Осы шаруашылық биыл қосымша 780 млн. теңге инвестиция салып, қойма қуаттылығын 7 мың тоннаға дейін жеткізген.

Шаруашылық басшысы Расул Тохтахуновтың айтуынша, қазіргі уақытта 300 тонна алма, 30 тонна көкөніс сақталынып тұр, оған қоса 1 мың  тонна картоп әкелу жоспарлауда. Қойманың бір бұрышы жеміс сүрлеу орны ретінде жабдықталады.

Р. Тохтанхунов картоп, пияз, сәбіз сияқты әлеуметтік маңызы бар өнімдерді сатып алып, сақтап, соның арқасында маусымаралық кезеңде жергілікті тұрғындарды арзан бағадағы өніммен қамтуға мүмкіндік бар екенін, осы мақсатқа мемлекеттен айналымға қаржылай көмек болса деген тілегін жеткізді. Бейбіт Исабаев:

- Талдықорған қаласында осындай үлкен қойма салынып жатыр, оның қуаты Талдықорған өңірін қамтуға толық жетеді. Ал Жаркенттегі бұл қойма Панфилов, Кербұлақ аудандары аумағында маусымаралық кезеңде бағаны ырықтандыруға ықпал тигізетін, халыққа пайдасы тиетін жоба болса, қолдау шараларын қарастыруға болады, - деді. Ол үшін алдымен оның өңірдің әл-ауқатын арттырудағы тиімділігін, қолдаудың қаржылық моделін – бәрін зерттеп, зерделеп көру керек. Бұл істі атқару тиісті лауазымды тұлғаларға тапсырылды.

Мұнан соң облыс басшысы бұрынғы Жаркент қалалық мәдениет үйінің ғимаратын сатып алу құқығымен 5 жыл мерзімге сенімгерлікпен басқаруға алған кәсіпкер Ильшат Османовтың спорт кешеніне келді. Ол ғимаратты 500 млн.теңгеге толықтай күрделі жөндеуден өткізіп, «Daraboz» спорттық кешенін ашқан. Мұнда бір мезгілде 120 адам жаттыға алады. Қазір мұнда 20 адам еңбек етеді. Бейбіт Исабаев тренажер, күрес, жекпе-жек залдарын аралап көрді. «Халықтың алғысын алып, туған жерге қызмет ете беріңдер», - деді облыс басшысы кәсіпкер азаматтарға.

Келесі нысан - Жаркентте «Жайлы мектеп» бағдарламасымен салынып жатқан 1200 орынды жаңа мектептің құрылысы алаңы. Мектепті бас мердігер «BI GLOBAL» ЖШС салуда. Жобалау-сметалық құжаты мемлекеттік сараптамадан желтоқсанның соңына дейін шығады деп күтілуде. Қазір аймақты құрылысқа дайындау жұмыстары басталып, құрылыс аймағы қоршалған. Фундамент құю жұмыстары жүріп жатыр.

- Бұл - облыс көлемінде «Жайлы мектеп» бағдарламасымен салынып жатқан алғашқы мектеп. Мұнан кейін осы бағдарлама аясындағы білім мекемелерін салатындар сіздердің осы құрылысқа үлгі ретінде қарайтын болады.  Бұдан соң Үшаралда, ал келесі жылы тағы 5 мектеп осы бағдарлама аясында салынады, - деді Б. Исабаев.

Облыс әкімі осы сапарында «Қорғас» ШЫХО-ның Головацкий ауылындағы бұрынғы ғимараттарының қазіргі жай-күйімен танысты. Соның бірі қазір 210 орынды «Жаскент» бөбекжай балабақшасы ретінде ашылып, жұмыс істеп тұр. Ал екінші ғимарат облыстық полиция департаментінің арнайы жедел бөлімшесіне (СОБР) берілген. Оған жөндеу жұмыстары жүргізіліп, жедел бөлімше мамандарының игілігіне берілетін болады.

Жетісу облысы әкімінің баспасөз қызметі.

Фотосуреттер авторы: Жеңіс Ысқабай

Источник: Акимат области Жетісу