Шымкент қалалық №1 клиникалық ауруханада аса күрделі жарақат алған науқасқа жоғары технологиялық ота сәтті жасалып шықты. Жол-көлік оқиғасына түсіп, көптеген жарақат алған науқас ауруханаға өте ауыр жағдайда жеткізілген.Оған шұғыл медициналық көмек көрсетіліп, травматолог-ортопед дәрігерлер бірнеше кезеңнен тұратын күрделі емдеу тактикасын жүргізді. Алғашқы кезеңде науқастың өміріне қауіп төндіретін жағдайларды тұрақтандыру мақсатында жамбас сүйегі мен оң жақ сан сүйегіне сыртқы фиксация аппараты (АНФ) орнатылды.Жалпы жағдайы тұрақтанғаннан кейін екінші кезеңде сыртқы фиксация аппараты алынып, бір мезгілде жамбас пен сан сүйектеріне күрделі реконструктивті операция жасалды.Операция барысында жамбас сүйектері арнайы реконструктивті пластиналар мен бұрандалардың көмегімен анатомиялық қалпына келтірілді, сан сүйегіне интрамедуллярлық остеосинтез орындалды.Мұндай операциялар жоғары кәсіби шеберлікті, тәжірибені және хирургиялық бригаданың үйлесімді жұмысын талап етеді. Қалалық №1 клиникалық аурухана мамандарының бірлескен еңбегінің нәтижесінде науқастың аяқ-қолының тірек қызметі қалпына келтіріліп, сүйектердің дұрыс бітуіне барлық жағдай жасалды.Қазіргі таңда науқас қанағаттанарлық жағдайда ауруханадан шығарылып, оңалту кезеңін бастап кетті.

Источник: ​ГУ "Аппарат акима города Шымкент"