Облыс әкімі төрағалық еткен жиында 2025 жылы жастармен жүргізілген жұмыстың қорытындылары мен алдағы кезеңге арналған жоспарлар талқыланды.

Мемлекет басшысының тапсырмасына сәйкес өңірде жастарды жан-жақты қолдау және дамыту жөніндегі жол картасы әзірленді. Құжатта қалалық және аудандық әкімдіктерге, сондай-ақ облыстық басқармаларға жастарды қоғамдық-саяси өмірге тарту, жұмыспен қамту, білім беру және спорт салалары бойынша нақты міндеттер жүктелген.

Жастар саясаты мәселелері жөніндегі басқарма басшысы Әлімбек Тұралиевтің айтуынша, биыл жастардың қоғамдық-саяси үдерістерге қатысу үлесін 37 пайызға дейін арттыру жоспарланып отыр. Бұл мақсатта қоғамдық кеңестер мен мәслихаттар құрамына жаңа жас өкілдер енгізіліп, мемлекеттік қызметке 50 жас маман қабылданады. Сонымен қатар, 20 мыңнан астам жас «Ақтөбе жастары» бағдарламасы, бизнес-идеяларды іске асыруға арналған гранттар және «Дипломмен ауылға!» жобасы арқылы қолдауға ие болады.

Жұмыспен қамту мәселесіне баса назар аударылған. Жыл ішінде 15 мыңнан астам жасты жұмыспен қамтамасыз ету, «Бастау бизнес» жобасы мен онлайн-оқыту бағдарламалары аясында білім беру көзделіп отыр. Жұмыссыз жастар үшін тағылымдамалар, кәсіби оқыту және олардың санын 1 000 адамға дейін азайтуға бағытталған жобалар қарастырылған.

Сонымен қатар, шамамен 190 мың жас ұлттық құндылықтарды дәріптеу шараларымен, 110 мыңнан астамы спорттық бағдарламалармен, ал 7 мың жас еріктілік қызметімен қамтылады. Жастар шығармашылық жобалар мен инкубациялық бағдарламаларға, соның ішінде «IT Hackathon – 2026» және «Aqtobe Hub Youth Incubation Program» жобаларына қатысады.

Жол картасының іске асырылуын бақылау мақсатында 2026 жылғы 20 қаңтардан бастап әкімдіктердің жұмысын бағалауға арналған KPI жүйесі енгізілді. Басқарма басшысының атап өтуінше, қабылданған шаралардың басты мақсаты – жастардың дамуына нақты нәтижелерге қол жеткізу және олардың өңір өміріндегі рөлін арттыру.

Өңір басшысы жоспарланған шаралардың орындалуына қатаң бақылау жүргізу қажеттігін атап өтті.

«Жасыл ел» жобасы бойынша жұмыстардың басталу мерзімін қатаң бақылауды және ағымдағы жылға арналған жоспарлы көрсеткіштерді ескере отырып, жастарды толық көлемде жұмыспен қамтуды тапсырамын. Сонымен қатар, жұмыссыз жастармен жұмысты күшейту маңызды. Барлық іс-шаралар нақты мониторингпен сүйемелденуі тиіс, бұл қабылданып жатқан шаралардың тиімділігін бағалауға мүмкіндік береді. Жастарды қоғамдық кеңестер мен мәслихаттар құрамына енгізуге ерекше назар аудару қажет. Әр аудан жергілікті өзін-өзі басқару органдарында жастардың өкілдігін қамтамасыз етуі үшін аудан әкімдерімен жастардың практикалық қатысу тетіктерін нақты келісу керек», – деп тапсырды Асхат Шахаров.

Источник: ГУ «Акимат Актюбинской области»