Қарттар күні қарсаңында елорланың Алматы ауданы бойынша Белсенді ұзақ өмір сүру орталығында зейнеткерлер арасында қол күрестен командалық жарыс ұйымдастырылды, деп хабарлайды елорда әкімдігінің ресми сайты.

Спорттық сайысқа «Жерұйық», «Айкүне», «Жаттығу залы», «Пилатес» және «Оңалту гимнастикасы» үйірмелерінің командалары қатысып, өзара бақ сынасты.

Жарыс барысында ерлер мен әйелдер арасында тартысты бәсеке өрбіді. Ерлер мен әйелдер арасында «Жаттығу залы» үйірмесінің ата-әжелері басымдық танытып, қарсыластарынан озып шықты. Сонымен қатар ерлер арасында «Оңалту гимнастикасы», ал әйелдер арасында «Айкүне» үйірмесінің қатысушылары жоғары нәтиже көрсетіп, өздерінің спорттық шеберліктерін танытты.

Іс-шараны ұйымдастыруға Алматы ауданы әкімдігінің Спорттық-бұқаралық іс-шараларды өткізу дирекциясы қолдау көрсетті.

Жарыс қорытындысы бойынша жеңімпаздар мен жүлдегерлерді Белсенді ұзақ өмір сүру орталығының директоры Серік Қарабатыров кубоктармен және мадақтама қағаздарымен марапаттады.

Спорттық шараның басты мақсаты – егде жастағы азаматтарды спортқа баулу, салауатты өмір салтын насихаттау, олардың белсенділігін арттыру және өзара достық қарым-қатынасты нығайту.

Жарыс Қарттар айлығы аясында ұйымдастырылып, қатысушыларға көтеріңкі көңіл күй мен жағымды әсер сыйлады.

Источник: ГУ «Аппарат акима города Астана»