Діни сауаттылық – бұл адамның дін тарихы, ілімі және діннің қоғамдағы рөлі туралы білімге ие болуы. Бұл тек діни рәсімдерді білу ғана емес, сонымен қатар оған сай ақпаратты дұрыс талдай алу қабілеті. Өкінішке қарай, бүгінде ғаламтор мен әлеуметтік желілер жастардың бос уақытын өткізетін алаңы ғана емес, сонымен қатар түрлі теріс пиғылды топтардың «аңшылық» жасайтын мекеніне айналды. Жасөспірімдерді арбап, өз қатарына қосуды көздейтін діни экстремистік ағымдар үгіт- насихат жұмыстарын осы виртуалды әлемде белсенді жүргізуде.Осындай қауіп-қатердің алдын алу және жастардың діни танымын кеңейту мақсатында Қызылорда қаласындағы №9, №189, №222, №282, №264 мектеп оқушылары мен М. Мәметова атындағы Қызылорда педагогикалық жоғары колледжінің студенттеріне «діни экстремизм, оның қоғамға қауіпі және оның алдын алу мен ұлттық дәстүрді сақтай білу маңыздылығы» тақырыбында ақпараттық-түсіндіру жұмыстары жүргізілді.Кездесудің негізгі мақсаты – ұлттық және рухани құндылықтарды насихаттау арқылы, жастардың діни сауаттылық деңгейін арттыра отырып, олардың экстремистік діни ағымдардың ықпалынан қорғау болды.Іс-шара барысында Сәкен Алдашбаев діни экстремистік ұйымдардың қоғамға тигізетін кері әсері туралы баяндап, олардың негізгі белгілеріне тоқталды. Сонымен қатар, жастардың сыни ойлау қабілетін қалыптастырудың маңыздылығын атап өтті.Баяндамашы ұлттық дәстүр мен мәдени мұраның жас ұрпақты тәрбиелеудегі рөліне ерекше назар аударып, дәстүрлі құндылықтарды сақтау арқылы, экстремисттік діни идеологияларға қарсы тұру мүмкін екендігін жеткізді.Сондай-ақ, жастарға интернет кеңістігіндегі діни мазмұндағы ақпараттарға сыни тұрғыдан қарау, тек ресми және сенімді ақпарат көздеріне жүгіну қажеттігі түсіндіріліп ескертілді.Жиын соңында студенттер көкейлерінде жүрген сауалдарына нақты әрі тұщымды жауаптар алды. Іс-шара жастарға діни тақырыптағы күрделі сұрақтардың түйінін тарқатуға мүмкіндік берді. Бұл шара тек ақпарат алмасу емес, рухани кемелденуге, дін мен дәстүр үндестігін тереңірек түсінуге бағытталған маңызды қадам болды.

Материал Қызылорда облысы бойынша ТҚК аппаратының ақпараты негізінде дайындалды

Источник: Антитеррористический центр Республики Казахстан