Петропавл қаласындағы «City Mall» сауда ойын-сауық кешені маңында және «Подгора» шағын ауданында түрлі террористік көріністерге қарсы іс-қимыл жасау үшін күш құрылымдарының жауынгерлік әзірлігін арттыруға бағытталған «Тарлан-Антитеррор-2024» жеке оқу-жаттығуы өткізілді.

Оған Солтүстік Қазақстан облысының Ұлттық қауіпсіздік комитеті, полиция және Төтенше жағдайлар департаменттерінің қызметкерлері, ұлттық ұлан академиясының курсанттары мен жергілікті атқарушы органдар қатысты.

Жеке оқу-жаттығудың негізгі мақсаты – ведомствоаралық өзара іс-қимыл және шартты террористерді залалсыздандыру мен кепілге алынған адамдарды босату бойынша тактикалық элементтерді пысықтау.

Іс-шара барысында терроризмге қарсы жедел топтардың террорлық сипаттағы қатерлерге ден қоюға дайындығы, терроризм актісінің салдарын азайту және жою мәселелері қарастырылды. Жаттығу кезінде әр жедел топтардың оқиғаны алдын алу, террористерге қарсы тұру бойынша іс-әрекеттеріне назар аударылды.

Жалпы терроризмге қарсы оқу-жаттығу түрлі күрделілік деңгейлерін қолдана отырып ұрыс жағдайына барынша сәйкестендірілгенін айта кеткен жөн. Өткен жаттығу лаңкестерді залалсыздандыруға, кепілге алынғандарды босатуға және тактикалық міндеттерді орындау бойынша қатысушылардың кәсіби деңгейін шыңдауға мүмкіндік берді.

Материал ҚР ҰҚК СҚО бойынша

департаментінің ақпараты негізінде дайындалды

Источник: Антитеррористический центр Республики Казахстан