Түркістан қаласында мектеп бітіргеніне 20 жыл толған түлектер қайырымдылық шарасын ұйымдастырып, игі бастамаға ұйытқы болды. «Бекзат» мөлтек ауданының 1988 жылы туған азаматтары дүниеден өткен құрдастары Жасұлан Бауыржанұлының отбасына 5 бөлмелі жаңа баспана тарту етті. Заман талабына сай бой көтерген жаңа үйді табыстау салтанатына Бекзат Саттархановтың анасы Сырлыкүл Адырбекқызы, облыстық Ақсақалдар алқасының төрағасы Есенәлімұрат Ізтілеуов, облыстық мәслихат депутаты Сүлеймен Арыстанов, қала әкімінің орынбасары Мадияр Алипов және қалалық мәслихат төрағасы Ғаппар Сәрсенбаев қатысып, ізгі тілектерін білдірді. Ұйымдастырушылардың бірі Мамырхан Пашанов: «Бұл үйді дүниеден өткен құрдасымыздың перзенттері өсіп-өніп, шаңырақтың жылуын сезініп, бақытты балалық шақ кешсін деген ниетпен тарту еттік», – деді. Айта кетейік, аталған мөлтек ауданда қайырымдылық эстафетасы бірнеше жылдан бері жалғасып келеді. Әз Наурыз мерекесі қарсаңында және мектеп бітіргендеріне 20 жыл толған азаматтардың бастамасымен мұқтаж отбасыларға баспана тарту ету дәстүрге айналған. Келесі жылы игі дәстүрді 1989 жылы туған азаматтар жалғастырады. Ал, 1996 жылы туған жастар мұқтаж отбасыға арнап салынып жатқан баспананың құрылысын 80 пайызға жеткізді. Жаңа үйді Ұлыстың ұлы күні қарсаңында иелеріне табыстау жоспарланып отыр. Түркістан облысы әкімінің баспасөз қызметі

Источник: ГУ "Аппарат акима Туркестанской области"