Жамбыл облысының оқушылары 2025-2026 жылдардағы оқу жылында халықаралық және республикалық олимпиадалар мен ғылыми жоба байқауларында жоғары нәтиже көрсетіп, өңір қоржынына 369 медаль салды. Бұл туралы облыстық білім басқармасының басшысы Нұрбек Оршыбеков мәлімдеді.   Басқарма басшысының айтуынша, республикалық ғылыми жобалар конкурсында облыс командасы 17 жыл қатарынан «Ең үздік команда» атағын иеленіп келеді. Сонымен қатар қоғамдық-гуманитарлық бағыттағы пәндер бойынша республикалық олимпиада қорытындысында оқушылары «Үздік олимпиадалық команда» атанды.   Биыл облыстағы 5 білім ұясы «Ең үздік олимпиадалық 100 мектеп» республикалық рейтингіне енді. Олардың қатарында дарынды балаларға арналған мамандандырылған «Білім-инновация» лицей-интернаттары, Тараз қаласындағы Ә.Бөкейханов атындағы №1 гимназия, Б.Момышұлы атындағы №45 қазақ классикалық гимназиясы және Т.Рысқұлов ауданындағы №6 мектеп-гимназиясы бар.   Мектеп түлектерінің ҰБТ нәтижесі де көңіл қуантады. Биыл 11-сыныпты аяқтаған 14 494 түлектің 639-ы «Алтын белгі», 1 212-сі үздік аттестат иегері атанды. Ұлттық бірыңғай тестілеуге 11 911 түлек, яғни түлектердің 82,5 пайызы қатысып, орташа нәтиже 79,9 балды құрады. Ал 4 түлек ең жоғары 140 балл жинап, облыстың білім саласындағы жоғары әлеуетін тағы бір мәрте дәлелдеді.   Білім алушылардың білім жетістіктерін мониторингтеу нәтижелері де облыс оқушыларының республикадағы көшбасшы өңірлер қатарында екенін көрсетті. 9-сынып оқушылары математикалық және жаратылыстану-ғылыми сауаттылық бойынша республикада 1-орын, ал оқу сауаттылығы бойынша 3-орын иеленді.   Жетістіктер тек оқушылармен шектелмейді. Биыл 76 педагог халықаралық және республикалық деңгейдегі байқаулар мен олимпиадалардың жеңімпазы және жүлдегері атанды. Ұстаздар «Педагогикалық идеялар фестивалі», «Teachers Hackathon», «Дарынды балаларға – талантты ұстаз», «Алтын тұғыр», «Математикалық регата», «OI SANDYQ», «Олимп шыңы» сынды беделді білім сайыстарында үздік нәтиже көрсетті.   Атап айтқанда, республикалық «Математикалық регата» олимпиадасында облыс командасы Бас жүлдені жеңіп алды. Бастауыш сынып мұғалімдері арасындағы республикалық олимпиадада ІІ орын, ал «OI SANDYQ» зияткерлік байқауында ІІІ орын иеленді. Мектепке дейінгі білім беру ұйымдарының педагогтері де республикалық байқауларда бірнеше Бас жүлде мен жүлделі орындарға қол жеткізді.

 

Источник: КГУ «Аппарат акима Жамбылской области»