2026 жылғы 4 наурызда 89 жасында Социалистік Еңбек Ері, еңбек ардагері, көлік саласының дамуына және тың жерлерді игеруге зор үлес қосқан Валентин Петрович Щербаков өмірден өтті.

Валентин Петрович 1936 жылы Пермь облысының Чусовой ауданындағы Шалашная ауылында дүниеге келген. Еңбек жолын 1952 жылы паровоз машинисінің көмекшісі болып бастаған.

1961 жылы Валентин Петрович тың жерлерді игеру жұмыстарына қатысу үшін Қазақ КСР-іне көшіп келді. Целиноград облысында Целиноград жүк автокөлік басқармасының автоколоннасында жүргізуші болып жұмыс істеп, өзін жоғары білікті маман ретінде көрсетті.

Көп жылдар бойы ол әртүрлі жүктерді, соның ішінде құрылыс материалдарын тасымалдады, ал егін жинау науқаны кезінде жыл сайын егіс алқаптарынан астық тасымалдау жұмыстарына қатысты. Валентин Петрович ауыр жүк автопоездарын басқарудың танымал шеберіне айналып, астық тасымалдайтын автопоездың салмағын 80 тоннаға дейін жеткізді.

1976 жылы ол егіс алқаптарынан элеваторларға 8200 тонна астық жеткізді. Жоғары еңбек жетістіктері мен социалистік жарыстағы жеңісі үшін оған автомобиль зауыты ұжымы атынан атаулы автокөлік табысталды.

Еңбектегі айрықша жетістіктері, көрсеткен еңбек ерлігі және астық өндіру мен мемлекетке тапсыру жөніндегі жоспарларды орындауға қосқан зор үлесі үшін 1976 жылы Валентин Петровичке Социалистік Еңбек Ері жоғары атағы берілді.

Сондай-ақ Валентин Петрович КСРО Жоғарғы Кеңесінің оныншы шақырылымының депутаты (1979–1984) болып сайланды. Көпжылдық адал еңбегі үшін ол екі Ленин орденімен және бірқатар медальдармен марапатталған.

Еңбек адамы, өз ісіне және туған жеріне адал болған Валентин Петровичтің жарқын бейнесі оны таныған және бірге еңбек еткен жандардың жүрегінде мәңгі сақталады.

Ақмола облысының әкімдігі Валентин Щербаковтың туған-туыстары мен жақындарына қайғыларына ортақтасып, көңіл айтады.

Источник: ГУ «Аппарат акима Акмолинской области»