Жетісу облысында Балқаш көлі жағалауындағы жер учаскелері инвесторларға ашық аукцион арқылы ұсынылатын болады. Бұл - көл жағалауын дамытуға бағытталған нақты қадамдардың бірі, - деп хабарлайды Жетісу облысы әкімінің баспасөз қызметі.

Бұған дейін Балқаш көлі жағалауы аймағының бас жоспары мен егжей-тегжейлі жоспарлау жобасы жасалып, соның аясында өңірде көл жағалауын қажетті инженерлік инфрақұрылыммен қамтамасыз ету жұмыстары жүргізілген болатын. Атап айтқанда, Талдықорған қаласынан Балқашқа дейінгі автокөлік жолы асфальтталды, барлық қажетті инженерлік желілер - су, электр және кәріз жүйелері тартылды. Енді жергілікті әкімдік тарапынан заманауи демалыс аймақтарын салу үшін инвесторларды тарту жұмыстары жүргізілуде.

- 12, 24 және 36 сотық көлеміндегі жер учаскелері барлық инвесторлар үшін ашық аукцион арқылы ұсынылады. Бұл табысты жобаларды жедел іске қосуға мүмкіндік береді. Бұл шағын қонақ үйлерден бастап, ірі рекреациялық кешендерге дейін кез келген ауқымдағы жобаларды жүзеге асыруға жол ашады. Сонымен қатар 2 гектарлық жер учаскелері ірі инвесторларға Өңірлік үйлестіру кеңесінің шешімімен беріледі. Қосымша ақпарат алу үшін Сарқан аудандық әкімдігіне хабарласуға немесе 8 (72839) 22-99-2 call-орталыққа қоңырау шалуға болады, - деді Сарқан ауданының әкімі Ғалымжан Маманбаев.  

Атап өтсек, Балқаш көліндегі шомылу маусымы 1 маусымнан 1 қыркүйекке дейін созылады, яғни жаз бойы туристерді қабылдауға мүмкіндік бар деген сөз. Жағалау жағажай демалысына, су спортына және балық аулауға өте қолайлы. Қазіргі таңда туристер легі бір маусымда 50 000 адамға жетеді, ал болашақта бұл көрсеткішті 500 000 адамға дейін арттыру әлеуеті бар.

Жетісу облысы әкімінің баспасөз қызметі.

Источник: Акимат области Жетісу